PRÆFATIUNCULA IN PERIERMENIAS

A

ristotiles scréib Cathegorias . , chúnt ze tûonne . , uuáz éinlúzzíu uuórt pezéichenên . ; uuíle er sámo chúnt ketûon in Periermeniis . , uuáz zesámine gelégetíu bezéichenên . , an dîen verum únde falsum vernómen uuírdet . , tíu latine héizent proloquia · . Án dîen áber neuuéder vernómen neuuírdet . , tíu eloquia héizent . , téro versuîgêt er án dísemo bûoche · .
Uuánda óuh proloquia geskéiden sínt .   - únde éiníu héizent simplicia . , dâr éin verbum íst . , ut "homo vivit" . , ánderíu duplicia . , dâr zuéi verba sínt . , ut "homo si vivit spirat" -  . sô lêret er hîer simplicia . ; in topicis lêret er duplicia · .
Fóne simplicibus uuérdent prædicativi syllogismi . ; fóne duplicibus uuérdent conditionales syllogismi · . Nâh perierminiis sól man lésen prima analitica . , târ er béidero syllogismorum geméina regula syllogisticam héizet . ; tára nâh sól man lésen secunda analitica . , târ er súnderîgo lêret prædicativos syllogismos . , tîe er héizet apodicticam . ; ze iúngest sól man lésen topica . , án dîen ér óuh súnderîgo lêret conditionales . , tîe er héizet dialecticam · . Tiu partes héizent sáment logica · .
Nû verním, uuîo er díh léite zûo dien proloquiis · .